Sælir félagar

Kortin eru farinn úr húsi með pósti og ættu að berast félagsmönnum næstu daga,það er óhætt fyrir maka og börn að sækja um kort á sömu kjörum,og er það gert á http://www.skeljungur.is/ og í reitinn sem stendur hópur þar verður að skrifa BKS til þess að réttur afsláttur sé settur á kortið.Nú þegar þið hafið kortin í hendi er ekkert annað eftir en að virkja kortið.

Þessi skilaboð vékk ég í morgun frá Hannesi hjá Skeljungi. Þegar kortin eru komin í hús hjá öllum þá verðum við að vera dugleg að hjálpa þeim að virkja kortin sem eru minna tölvuvæddir en aðrir

Aðalfundur 2009

Aðalfundur Bifreiðaklúbbs Suðurlands verður haldinn föstudaginn 13. febrúar en ekki fimmtudag 12. eins og stendur hér neðar. Ástæðan er einfaldlega sú að Gónhóll er upptekinn þetta kvöld. En þetta verður að sjálfsögðu boðað skriflega.  

Í undirbúningi er að taka á móti félögum okkar úr borginni þann 11. mars.  

Shellkortin

Ég ætla að biðja félagsmenn að bíða með að sækja um nýju Shellkortin. Hannes hjá Skeljungi hafði samband við mig í dag og hann ætlar að senda okkur kort í næstu viku og þegar þau eru komin þurfum við bara að tengja.

Kort þessi verða svo látin gilda sem félagsskírteini.

Kveðja, skrifarinn. 

Gleðilegt nýár.

Stjórnarfundur var haldinn að kvöldi 11. janúar og var ákveðið að boða til aðalfundar fimmtudagskvöldið 12. febrúar. Efni fundarins sem, verður boðað til bréflega, með fyrirvara samkvæmt lögum félagsins, verður eitthvað á þessa leið.

1. Kosning fundarstjóra.
2. Skýrsla stjórnar.
3. Ársreikningur lagður fram til samþykktar.
4. Kosning stjórnar.
5. Kosning ferða og skemmtinefndar.
6. Lagabreytingar. Hugmyndin er að athuga hvaða lög gilda um lengd stjórnarsetu. 
7. Önnur mál. 

Við höfðum samband við Fornbílaklúbbinn, buðum þeim í heimsókn í byrjun Mars og var vel takið í erindið. Hugmyndin er að taka á móti þeim í Gónhól á Eyrabakka og sýna þeim kvikmynd Gunnars Sigurgeirssonar og Sverris Andréssonar sem er orðin til í fullri lengd. Að sjálfsögðu verðum við með heitt á könnunni og mætum öll til að taka á móti bræðrum okkar úr borg óttans.

Kveðja, skrifarinn.   

Sæl öll og gleðilega hátíð

Á afmælisdegi formannsins þann 16. desember var skrifað undir samning við Skeljung þar sem klúbbmeðlimir fá veglegan afslátt af elsneyti og ýmsum vörum sem Skeljungur og tengdir aðilar hafa upp á að bjóða. Jafnframt verður viðskiptakortið látið gilda sem félagsskírteini inn í klúbbinn. Afslátturinn er veglegur eins og áður sagði en rúsínan í pylsuendanum er, að klúbburinn fær 1 krónu í styrk frá Skeljungi fyrir hvern seldan lítra til meðlima klúbbsins. Þessi afsláttur gildir aðeins á debetkort en afslátturinn minnkar um eina krónu ef notað er kredit. ATH að ORKAN er í eigu Skeljungs og gilda afslættirnir okkar þar líka.

Til að sækja um kort er farið inn á  http://www.skeljungur.is/ og klikkað á "kortaþjónusta Skeljungs". Í reitnum fyrir einstaklinga og fyrirtæki er valið "umsókn". Eftir það er sett BKS í reitinn hópur. annað liggur ljóst fyrir.   

Annars er síminn hjá mér 664-8082    

Jólafundurinn

verður haldinn á Sótastöðum föstudaginn 19. des. klukkan 20 hvar klúbbmeðlimir munu saman koma og glöggva sig á ástandinu sem ríkir í þjóðfélagi voru. Einnig ætla eftirfarandi meðlimir að vera með uppákomur. 

Gunni Þórmunds ætlar að kenna okkur að búa til músastiga úr krep-pappír.

Einar El sýnir okkur hvernig búa má til jólaskreytingar úr drenrörum á einfaldan hátt.

Steini Smur leiðbeinir í skreytingu piparkökuhúsa með koppafeiti.

Emil og Gulli koma með póstkassa fyrir þá sem ekki eru búnir að fara með jólkortin.

Anna formaður mætir í kynæsandi jólasveinabúningi.

Þuríður formaður mætir ekki.

Nonni Dodda kennir okkur að tengja eins og pabbi Doddi kenndi honum.

Sjáumst í jólaskapi.  Ritarinn

 

Hittingur á föstudagskvöld kl. 20.00 á Sótastöðum

Við ætlum að koma saman og skrafa á föstudagskvöldið. Þetta með Desotoafmælið er orðið svo þreitt að tilefnið á morgun er 131 árs afmæli ömmu Erlings gjaldkera, ef hún hefði lifað. Svo stendur til að máta bílstjóra-kaskeiti sem komin eru loksins til landsins en þau eru bresk að uppruna og gekk því ekki þrautalaust að koma þeim heim. Það var ekki fyrr en Davíð hringdi í Brown, sagði okkur ekki vera óreiðumenn og Geir veitti okkur ríkisábyrgð að eitthvað fór að ganga.

Sjáumst hress.

Straumlínulagaðar stuðarakveðjur.

Ritarinn.   

Rútuferð í borg óttans

Anna formaður 894-2522 og Gulli rútukall 863-1214 eru á botni (samt ekki á hafsbotni með bönkunum) að taka niður pantanir í rútuferðina sem farin verður miðvikudagskvöldið 22. okt. Tilefnið er að horfa á myndasyrpu með þjáningabræðrum okkar í borginni og verður myndefnið aðallega frá Stóragerðisferðinni sem farin var, sælla minninga, í september er leið. Skemmst er frá því að segja að farið verður frá Sótastöðum klukkan 19.30 stundvíslega. Get ég ekki annað en hvatt utan og innanfélagsmenn að fjölmenna í ferðina. Farkosturinn er að vanda X 874 og sem ég sit hér í eldhúsinu í Lyngheiðinni og hripa þessar línur, þá get ég svarið að rútubifreiðin færi ferðina af gömlum vana þó enginn væri bílstjórinn. En þá mundu þið nú lenda niðri á BSÍ og væruð farin að háma í ykkur kjamma og uppstúf áður en við væri litið. Þá er nú líklega betra að leifa Gulla að stýra. 

Sjáumst hress

Stjórnin      

Góð þáttaka

Það eru 40 fullorðnir skráðir í haustgrillið og svo verða börnin ca 10 talsins.  Rútan tekur 54 í sæti svo aðeins 4 vantar í fullan bíl. Gerum bara betur næst.  Skráning fór hægt af stað en svo á fimmtudagsmorgun er skemmst frá því að segja að fólk kastaði frá sér sláturgerðinni í umvörpum, reif af sér hvítu slátrarasvuntuna, konur settu upp andlitin og karlarnir skelltu á sig bílstjórahúfunni. Svo stungu allir góða skapinu í vasann og skráðu sig í óvissuferð. Ég er að vísu svo mikill fréttamaður í mér að ég held ég hafi munað eftir að segja öllum hvert við erum að fara.  (ekki segja Önnu) En ég óska okkur góðrar ferðar og skemmtunar.     

Töðugjöld Bifreiðaklúbbs Suðurlands Laugardaginn 11.okt. 2008

Sæl meðlimir og aðrir gestir er hér kunna að rekast inn. 

Í þessari fyrstu færslu þessarar bloggsíðu sem er jafnframt 1. heimasíða klúbbsins okkar ætla ég að minn á óvissuferð þá er boðað hefur verið til laugardaginn 11. október. Þrátt fyrir að allar verstu hrakspár svartsýnustu þunglyndissjúklinga hafi nú ræst blásum við í lúðra og höldum hátíð. Mæting er klukkan 17 hundruð að Sótastöðum í Selfosssveit í Árnesþingi. Skráning er hafin og munu Erling 862-9064, Vignir 664-8082 og Anna 894-2522 taka við skráningum. Skráning verður opin til hádegis á fimmtudag. Verði er að sjálfsögðu stillt í hóf og greiða meðlimir kr. 1000 en makar kr. 2500 ef krónan verður ennþá til á laugardaginn. Innifalið í verði er rútuferð (X 874 að sjálfsögðu) og veisluhöld, þ.e. matur og gos. Aðra drykki verða þátttakendur að hafa með sér.

Bestu kveðjur

Magnús Vignir, ritari Bifreiðaklúbbs Suðurlands