Rútuferð í borg óttans

Anna formaður 894-2522 og Gulli rútukall 863-1214 eru á botni (samt ekki á hafsbotni með bönkunum) að taka niður pantanir í rútuferðina sem farin verður miðvikudagskvöldið 22. okt. Tilefnið er að horfa á myndasyrpu með þjáningabræðrum okkar í borginni og verður myndefnið aðallega frá Stóragerðisferðinni sem farin var, sælla minninga, í september er leið. Skemmst er frá því að segja að farið verður frá Sótastöðum klukkan 19.30 stundvíslega. Get ég ekki annað en hvatt utan og innanfélagsmenn að fjölmenna í ferðina. Farkosturinn er að vanda X 874 og sem ég sit hér í eldhúsinu í Lyngheiðinni og hripa þessar línur, þá get ég svarið að rútubifreiðin færi ferðina af gömlum vana þó enginn væri bílstjórinn. En þá mundu þið nú lenda niðri á BSÍ og væruð farin að háma í ykkur kjamma og uppstúf áður en við væri litið. Þá er nú líklega betra að leifa Gulla að stýra. 

Sjáumst hress

Stjórnin      

Athugasemdir

[Anna S. Árnadóttir, 27.10.2008 kl. 23:31]

Já, þetta var óhemju góð ferð þó ekki væri nú mætingin mjög stórkostleg. Það var virkilega góðmennt samt, aðeins toppfólk sem mætti og skemmti sér vel í rútunni yfir hvíta heiðina okkar. Það var vel tekið á móti okkur í AMOKKA kaffihúsinu og við skemmtum okkur einmuna vel í góðum félagsskap og myndirnar voru einstaklega góðar eins og góðgjörðirnar. Fornbílamenn töluðu um að við ættum endilega að koma oftar í bæinn og gleðjast með þeim og eins vilja þeir koma austur yfri til okkar og teitast með okkur...já það er gott að eiga góða að á þessum tímum..við þurfum að vera duglegri að senda þeim skeyti og segja frá því sem við erum að gera hér. Munum það saman háttvirti ritari.

kaggakveðjur

formaðurinn